బ్లాగ్లోకం

ఒక మాలోకం

చాలా రోజులుగా బ్లాగులు చదివే అవకాశం రాలేదు. చాలా మిస్ అయ్యాను. ఇప్పుడు అవకాశం రాగానే, మెలుకువగా వున్నంతసేపూ అన్ని బ్లాగులూ చదివెయ్యాలనిపిస్తోంది.

నిజం గా బ్లాగు లోకం వండర్ ఫుల్.

ఇక నా అభిమాన హాస్య నటుడు "AVS" గారు బ్లాగు లోకం లోకి ప్రవేసించడం శుభ పరిణామం. హాస్య బ్రహ్మలూ వగైరా ఇప్పటికే వున్నందు వల్ల ఈయన్ని హాస్య నారద అనచ్చేమో!

మొట్టమొదటే, హాట్ కేకు లాంటి టపా రాసేశారు. సీడీలు చూసేవాళ్ళందరూ వెంటనే మానెయ్యాలని 'ధాఋణం' గా శపించేశారేమిటండీ బాబూ! (సినీ పరిశ్రమ లోని అందరి గురించీ రాస్తే, ఏ సంపాదనా లేని నాలాంటివాళ్ళమాటేమిటండీ బాబూ! మేము సినిమాలు యెలా చూడాలి?)

కామెంట్లు చదువుతుంటే, సరదాగా వుంది. విమర్శల్ని సమర్థించేవాళ్ళు కొంతమంది, ఎదురుదాడి చేసేవాళ్ళు కొంతమంది, పాత టపాలకి లింకులు ఇచ్చేవాళ్ళు కొంతమంది, అనవసరం గా ఆవేశపడిపోయేవాళ్ళు కొంతమంది, కీ బోర్డు చేతిలో వుంది కదా అని వెర్రి వాగుడు వాగేవాళ్ళు కొంతమంది!

AVS గారి 'రెస్పాన్సిబుల్ రెస్పాన్స్' కూడా బాగుంది. దాని మీద కామెంట్లు ఇంకా బాగుంటున్నాయి.

కృష్ణశ్రీ అయితే ఓ టపానే రాసేశారు. 'గౌరవం వుంది' అంటూనే, ఏకేశారు. యెందుకండీబాబూ అంత సీరియస్ కామెంట్లు.

కాని నాకొకటి నచ్చింది. 'ముందు తెలుగు బాగా వ్రాయడం చదవడం నేర్చుకొని' అని ఆయన ఇచ్చిన సలహా.

ఈ మధ్య టీవీల్లో కూడా పైరసీ వల్ల సినీ పరిశ్రమకి వస్తున్న నష్టాలు గురించి బాగానే చూపిస్తున్నారు.

అలాగ అని సీడీ లు అద్దెకిచ్చి/అమ్ముకొని పొట్ట పోషించుకునే వాళ్లని 'చావ బాదడం' అగ్ర నటుల, వాళ్ళ అభిమానుల హీరోయిజం అనిపించుకుంటుందా?

అసలు పైరసీ అనేదానికి మూలం ఎక్కడ ఉందో ఆలోచించండి. 30 రూపాయలకి 3 సినిమాలు వాళ్లిస్తున్నారు కదా, మీరు కనీసం పాతికకో, ఇరవై కో ఇస్తే, దీన్ని నివారించవచ్చు కదా?

నా చిన్న బుర్రకి తట్టిన ఆలోచన ఇది.

AVS గారు బోళ్లు టపాలు రాయాలనీ, అందరినీ అలరించాలి అనీ కోరుకొంటా.